Vip Shpija – Shpija e Kosoves

Menjëherë pas përfundimit të edicionit të parë “Shpija”, ky shou u kritikua mjaft për cilësinë që ka ofruar para shikuesve, por njëkohësisht edhe për përzgjedhjen e kandidatëve, të cilët u kritikuan shumë se nuk ishin të edukuar sa duhet dhe asnjëherë nuk arritën të japin mesazhe të mira për shikuesit. Ndërkohë, u tha që në edicionin e dytë kandidatët do të ishin më të mirë në të gjitha aspektet, por ishte edhe më i dobët se sa edicioni i parë, i cili u shqua për fyerje, banalitet, e në disa raste debatet gati sa nuk përfunduan në rrahje. Dhe, të gjithë kandidatët sapo dolën nga ky shou mendonin se ishin në qendër të vëmendjes, por kur u ballafaquan me realitetin e panë se megjithatë nuk kishin aq famë sa kishin imagjinuar. Tash pas dy vjetësh që ka përfunduar ky reality-shou, konkurrentët e këtij edicioni thonë se në disa raste edhe vetë populli i ka fajet, sepse më shumë i respekton të tjerët se sa talentet e veta. Këtu ata mund të aludojnë edhe te shou shumë i suksesshëm “Big Brother Albania”, i cili të gjithë pjesëmarrësit e tij të të gjitha edicioneve, jo vetëm që i ka bërë të famshëm, por disa prej tyre edhe i ka punësuar, që do të thotë se është produksion mjaft i suksesshëm dhe serioz. Ndërkaq, kandidatë e “Shpisë”, jo vetëm që nuk kanë fituar vende pune, por disa prej tyre kanë vazhduar të punojnë punët e tyre të përditshme. Fadil Dini, i cili doli fitues i shou “Shpija” në edicionin e parë, thotë se fama u ka humbur për arsye se ne si popull nuk dimë t’i vlerësojmë si duhet talentet. “Ka humbur fama, sepse jemi popull naiv dhe injorant dhe i vetmi vend në botë që i vlerëson vlerat e të tjerëve, përpara se talentet e veta”, thotë ai, duke thënë se edhe vetë “Shpija” nuk është interesuar shumë për ta, por i ka shikuar vetëm interesat e veta. Ndërkaq, njëra nga kandidatet që fitoi më së shumti në këtë reality-shou, Saranda Hoda, e cila e fitoi operimin falas në Itali, thotë se është shumë normale që pas një kohe të gjithëve u humb fama nëse nuk janë aktivë. “Është normale që në çdo reality-shou fama nuk zgjat shumë, sepse e fiton shumë shpejt dhe e humb po aq shpejt, natyrisht nëse nuk di ta ruash atë. Unë për vete kam pasur shumë të mira nga ky reality-shou, pra kam fituar mjaft dhe nuk mund të ankohem”, thotë ajo. Njëri nga kandidatët me kontravers të edicionit të parë të “Shpisë”, Muhamet Zeqiri, thotë se ky reality-shou i ka sjellë gjëra pozitive, por edhe negative. “Unë mendoj se nuk është fajtor produksioni, por as ne si ish-pjesëmarrës, thjesht vetë populli i Kosovës nuk është i përgatitur për këso lloj emisionesh. Reality-shou “Shpija” më ka sjellë gjëra pozitive, por po ashtu edhe pak negative, sepse fama nuk është edhe aq e mirë për Kosovë”, thotë ai, duke shtuar se ai për momentin pjesën më të madhe është duke e kaluar në Itali, ndërkaq ka dy muaj që është fejuar. Kurse pjesëmarrësit e edicionit të dytë kanë mbetur tërësisht në hije dhe asnjëri prej tyre nuk ka arritur ta dëshmojë famën e fituar në këtë reality-shou.

B. ZYBERI

Edicionin e parë të shout të ri “Vikend Shpija”do ta hapin futbollistët kosovarë të gjeneratës së artë, kanë bërë të ditur për Telegrafi-n organizatorët e këtij spektakli.

Futbollistët të cilët do ta hapin këtë show veror janë: Muharrem Sahiti, Rafet Pregazi, Ajet Shusholli, Isa Sadriu, Xhelal Kuqi, dhe Mentor Miftari.

Mysafirët brenda dy ditëve do të debatojnë në lidhje me futbollin, ndërsa përveç kësaj ata edhe do të luajnë lojëra të ndryshme sportive.

Ky emision i formatit sikurse “VIP Shpija” do të fillojë sonte që nga ora 20:00 dhe atë mund ta ndiqni në rrjetin kabllor “Kujtesa”.

Show më i ri në Kosovë, “Vikend Shpija”, një reality shou i formatit “VIP Shpija”, do të fillojë të argëtojë teleshikuesit kosovarë që nga kjo e premte, kanë bërë të ditur organizatorët e shout për Telegrafi.

Çdo edicion të saj “Vikend Shpija” do të ketë një temë të veçantë, e cila do të debatohet gjatë qëndrimit të mysafirëve në “Vikend Shpija”. Temat e përzgjedhura deri tani janë: futbolli, arkitektura, sporti, moderatorët, arti, manekinet vs manekinët, disenjatorët, produktet vendore, etj. Mysafirët do të ftohen varësisht nga tema e “Vikend Shpijës”.

Gjatë “Vikend Shpijës” do të ftohen nga 6 mysafirë, mysafirët do të jenë të profesionit të njëjtë (aktorë, moderatorë, sportistë). Të ftuarit do të jenë nga gjenerata e re dhe ajo e vjetër, që të lindin debatet rreth ndryshimeve të gjeneratave.

Ky emision pothuajse i formatit të njëjtë sikurse “VIP Shpija” do të transmetohet çdo vikend deri në fund të sezonit veror. Emision do të transmetohet në rrjetin kabllor Kujtesa.

Fundjavën e ardhshme pritet të startojë emisioni më i ri “Vikend Shpija”. Ky emision do të jetë me të njëjtin format sikurse “Vip Shpija”, por të ftuarit do të qëndrojnë vetëm 48 orë brenda emisionit, pra vetëm për vikend.

Organizatorët e këtij emisioni për Telegrafi kanë treguar se mysafirët apo VIP-at të cilët do të jenë të përzgjedhur do të kenë një temë të caktuar të cilën ata do ta diskutojnë gjatë këtyre orëve.

Në “Vikend Shpija” priten të hyjnë futbollistët e vendit tonë të gjeneratës së artë të cilët do të diskutojnë për futbollin.

Ky emision do të transmetohet në Kujtesa dhe gjithsej gjatë stinës verore do të jenë 12 emisione. /Telegrafi/

Fituesi i “VIP Shpija 2”, Ardit Stafaj, gjatë një interviste për Telegrafi.com ka treguar se ndjehet shumë mirë dhe shumë i lumtur që në fund triumfoi ai.
“Jam shumë i lumtur, ndihem shumë mirë që arrita të triumfoj. Ka qenë një eksperiencë shumë e mirë për mua, i falënderoj organizatorët dhe publikun që nuk më kanë harruar pas gjithë këtyre viteve”, është përgjigjur ai.

Ndërsa i pyetur se sa ka qenë Arditi i vërtet brenda shtëpisë, ai është shprehur pa asnjë rezervë se brenda “VIP Shpija” ka qenë po ai që është në jetën e përditshme.

“Nuk kam ndenjur me rezerva. Këtë e vërtetoi më së miri edhe publiku në fund. Arditi nuk ndryshon për askënd dhe nuk dua askush të ndryshojë për mua. Thjesht Arditi ka qenë 100 për qind fiks i cili është edhe jashtë”, ka pohuar Stafaj.

Arditi ka pohuar se ai do t’i mbajë të gjitha raportet me ish banorët e “VIP Shpija” pavarësisht debateve që ai ka pasur aty brenda.

“Unë nuk hidhërohem lehtë, sidomos jo për gjëra dhe fjalë banale, sepse dikush ka hyrë me lojë aty, e unë jo. Për mua raportet do t’i mbaj me të gjithë. Aty brenda të gjithë e treguan veten si për mirë ashtu edhe për keq, por unë nuk kam kundër asgjë dhe raportet do t’i mbaj me të gjithë”, është shprehur më tej këngëtari.

Stafaj, i cili fitoi një veturë si shpërblim në “VIP Shpija 2”, po ashtu ka thënë se vëllai i tij binjak, Astiriti ka pasur fatin ta ndez atë i pari.

“ Veturën e kam marrë po atë natë, ndërsa i pari e ndezi vëllai im binjak, Astriti”, ka përfunduar Ardit Stafaj.

Pas shumë e shumë debateve, argëtimeve e besa edhe fjalosjeve, dalë ngadalë i erdhi fundi edhe spektaklit “Vip Shpija 2”.
Nesër për finalistët do të jetë një natë plot emocione. Pas gjithë asaj ‘sakrifice’ secili prej tyre e ëndërron automobilin që “Vip Shpija” do ta ndajë për fituesin.

Organizatorët e “VIP Shpija 2” për Telegrafin kanë treguar se është një konkurrencë shumë e madhe mes banorëve të shtëpisë së famshme dhe deri nesër asgjë nuk është definitive.

Konkurrentët të cilët do të garojnë për çmimin janë: MC Kresha, Xuxi, Qetsor Feruna, Rovena Stefa, Ardit Stafaj dhe Elida Shasivari (Moja).

Tre këngëtarët kosovar, Lyrical Son, Dj Drit’on dhe Lav’da njëherësh edhe shokët e banorit të VIP Shpija 2, Mc Kreshës.

Vlen të thuhet se Lyrical Son (Festimi) është shok i ngushtë i Mc Kreshës. Këta tre do të argëtojnë sonte banorët e VIP Shpija 2.

E siç dihet po të nxehen reperat kosovar atmosfera kallet dhe banorët çmenden duke vallëzuar.

Dy banorët e paralajmëruar se do futen në VIP Shpija 2, Haxhi Merrxha dhe Mariza Ikonomi tashmë janë futur brenda mureve të shtëpisë.

Haxhi Merrxha u fut i pari brenda, u përshendet me të gjithë banorët dhe filloi të fliste serbisht më fotomodelen e njohur Kristina Lumbar. Ai foli tregoi shumë histori që i kanë ndodhur ne jetën e tij.

Më pas u fut edhe Mariza Ikonomi, por ajo u fut më e qetësuar, vetëm u përshendet më banorët dhe nuk foli aq shumë.

Bertina është larguar nga VIP Shpija në spektaklin e zhvilluar të premtën mbrëma, përderisa në shtëpi ka hyrë si mysafire modelja kroate, Kristina Lumbar.

Ish-banorja e Big Brother, Bertina, nuk arriti t’i sigurojë votat e mjaftueshme të publikut kosovar për të qëndruar në shtëpi, përkundër dukjes së saj fantastike në spektaklin e të premtës.

Vlen të përmendet hyrja në shtëpinë më të madhe në Kosovë si mysafire të modeles kroate Kristina Lumbar, ndërsa sipas burimeve të Telegrafit, i zoti i shtëpisë pritet që së shpejti të zbulojë edhe një befasi, mysafire do të jetë edhe një modele tjetër kroate, emri i të cilës mbahet i fshehtë.